حكاية واحد صاحبي غلبان

مرة واحد صاحبي غلبان قعد يتعب سنين لغاية ما حوش شوية فلوس على جنب وراح للجزار اداله ٢٠٠ جنيه وقال له: عاوز ٢ كيلو لحمة من أحسن حاجة عندك

قام الجزار بعد ما اخد الفلوس لف له شوية عضم في ورقة وادّاهم له وقال له: ياللا اعمل لك عليهم شوية شوربة واحمد ربنا ما حدش لاقي لحمة اليومين دول

الراجل الغلبان زعل جدا وقال للجزار: انا دافع ٢٠٠ جنيه وعاوز اللحمة اللي انا طلبتها

الجزار قال: له بص يا أستاذ المحل مافيهوش لحمة ولازم تستنى معايا شوية وتصبر

الراجل الغلبان صوته ارتفع وقال للجزار: انت راجل ضلالي ونصاب وكان لازم تقوللي من الأول انك ما عندكش لحمة ومالِكش في الجزارة

الجزار راح مزعق هو كمان وراح مشهّد الجيران وقال لهم: شوفوا الجدع ده مين اللي زقه علينا ومديله فلوس عشان يكسر لنا المحل وفي الآخر ماحدش فيكوا حيلاقي لحمة

الجيران راحوا واخدين الراجل الغلبان على جنب وحاولوا يهدّوه ويطلبوا منه يسيب الجزار في حاله عشان الحارة تلاقي لحمة تاكلها

الراجل الغلبان قعد يزعق ويقول للناس: ياجدعان ده نصاب كبير وضحك عليا أخد فلوسي تحويشة عمري وما عندوش لحمة أصلا انتو اتعاملتوا معاه قبل كده؟

الناس تهدّي فيه وتقول له: مش ممكن يكون نصاب عشان احنا عارفين عيلته كويس كلهم ناس طيبين. صحيح ما اتعاملناش معاه في الجزارة قبل كده عشان احنا أصلا ما بناكلش لحمة من زمان بس عارفين عيلته كويس

واحد من الناس من الغلابة اللي ما تعبوش في تحويش الفلوس زيه أخده على جنب وقالو له في ودنه: يا أخي ما تحمد ربنا صحيح هو حد لاقي لحمة اليومين دول؟ وبعدين مالها الشوربة يا أخي حد طايل؟ ده انا حتى ما شفتش حتى الشوربة من شهور طويلة

قام الراجل الغلبان زقّه بإيده وقال له بانفعال: ياعم سيبني في حالي انت ما تعبتش في الفلوس زي ما انا تعبت أنا مدّيله ٢٠٠ جنيه وتمن الكيلو بالكتير ٧٠ جنيه وفي الآخر يديني شوية عضم لازم اروح آخد حقي من الراجل النصاب ده

جري تاني على محل الجزارة ومسك في خناق الجزار وقال له لو ما اديتنيش اللحمة أو الفلوس دلوقتي حالا حاكسر لك المحل بتاعك

الجزار اترعب شوية وبعدين استجمع قوته وقال للراجل الغلبان بهدوء: طيب تعالى نقعد ونتكلم يمكن نوصل لحل

الراجل الغلبان سمع الكلام ودخل المحل وقعد على كرسي مريح وشرب شاي

الجزار قال له: انت طلبت لحمة وانا قلت لك حاديك اللحمة اللي انت عايزها بس صبر نفسك بشوية الشوربة وبعدين حاجيب لك لحمة لما اللحمة توصل

الراجل اتجنن وزعّق: أولا انت ماقلتش كده خالص. انت اديتني العضم وقلت لي احمد ربنا. ثانيا لما انت ما عندكش لحمة يبقى تديني الفلوس اشتري من جزار تاني يكون عنده

الجزار حاول يهدّيه وقال: بص يا أستاذ المحلات التانية كلهم مشبوهين وما تعرفش البهايم بتاعتهم بيدبحوها فين وازاي حرام وللا حلال وجايز يكونوا بيهربوها من التفتيش البيطري كمان

الراجل اتجنن اكتر وقال له: ياسيدي مشبوهين مشبوهين بس عندهم لحمة. انت أصلا ما عندكش حاجة. وبعدين اديني الفلوس وانا حر اعمل بيها اللي انا عاوزه.

شوية ودخل عليهم واحد شكله متدين وسأل: هو حضرتك اللي عامل مشكلة؟ المفروض تكون مبسوط ان الحته فيها الجزار ده. عاوز تدخل النار يعني وللا يجيلك أمراض من لحمة الجزارين التانيين؟ استهدى بالله يا أستاذ واصبر شوية وان شاء الله لما تيجي اللحمة حنبعتها لك عالبيت. انت قلت عاوز لحمة نوعها إيه؟

الراجل اتجنن اكتر وصرخ فيهم هم الاتنين: انتوا كلكوا نصابين وضلالية وانا غلطان اني قعدت معاكوا أصلا وراح زاقق الكرسي برجله وخرج من المحل بيفكر ازاي ياخد الفلوس بتاعته من الجزار

يطلب البوليس ويشمع لهم المحل؟

يجيب قرايبه ويدخلوا المحل بالعافية وياخدوا الفلوس من الخزنة ويمشوا؟

وللا يستعوض ربنا في الفلوس ويحوش غيرهم؟

ولحد النهارده لسه بيفكر